絲絲講場：蓋茨送別保曼講到喊
微軟周二舉行股東大會，場面較往年「墟冚」，工作人員甚至要喺會議進行途中加櫈。今次股東大會最感性嘅，一定係創辦人蓋茨。
話說佢分享自己同將離任嘅行政總裁保曼共享嘅信念嘅時候，不禁嗚咽起嚟，好希望微軟可以確保新CEO係個「切合時機嘅人選」（right person for the right time），又話大家都堅信微軟會以一間「令世界更美好」嘅企業，屹立於世。
其實蓋茨咁感觸都唔出奇，因為佢同保曼係哈佛讀書時嘅死黨，一齊帶過足球隊，辦過校報，住埋同一層宿舍；八○年保曼加入微軟，成為第30名員工後，兩個簡直可以話係拍住上打江山添！咁多年戰友臨別在即，依依不捨就梗有o架啦！
下任CEO冇漏口風
至於市場引頸以待嘅新舵手，蓋茨除咗話對董事局遴選工作嘅進度感到滿意，同埋自己已經同好多人選見過面之外，根本冇畀過關於下任CEO嘅「貼士」。
至於即將離任嘅保曼，其實都係今次嘅焦點，但佢收起咗九月內部會議時，喊住口向員工講Byebye嗰種離愁別緒，全程保持笑容。有股東問佢，如果第日美國有科技部長去唔去做，佢好風趣咁答，「多謝你幫我搵工！」