近排炒到香噴噴嘅騰訊（00700），究竟幾錢先至係頂？相信股神都答你唔到，但就肯定帶挈公司班董事發達。好似騰訊獨立非執董李東生，啱啱沽清手上剩返嘅4萬股騰訊套現1,674.2萬元。
騰訊執董劉熾平（Martin）就沽咗10萬股，而且個價仲靚，4,203.37萬元袋袋平安，分分鐘係今年嘅打工皇帝，而最令人眼紅嘅係，Martin手上仲揸住價值超過37.7億元嘅騰訊股票呀！
翻查一三年嘅聯交所資料，Martin喺五月以33.05元行使150萬股騰訊，又喺八月底以同價行使50萬股，然後佢「慢慢搣」，由五月至八月分4次，每次十萬廿萬出貨，個價大約由303元至356元左右；十一月十九日再以平均價420.337元沽10萬股，套現4,203.37萬元，雖然佢喺十月廿一日騰訊創455蚊歷史新高時無沽到，但今年共5次套現已經袋咗近2億銀！
咁仲唔只，Martin原來仲有成200萬股行使價33.05元嘅騰訊明年七月先到期；100萬股行使價158.5元嘅就二○二○年到期，手上嘅好倉仲有成900.36萬股，以尋日騰訊收市價419蚊計，市值37.72億元，夠絲絲用幾世喇！
其實，Martin早喺一○年行使咗440萬股騰訊，平均行使價只係10.15元，大家都估佢係嗰年交稅最多嘅「打工皇帝」。
至於本身係TCL集團董事長嘅李東生，上個月八日以每股25.26元行使咗4萬股騰訊，等到呢個月十五日出貨，上一次行使已經係前年三月，都係以25.26元行使咗6萬股，都賺咗超過一千萬。
依家計埋計埋，兩位董事其實賺少咗好多，不過講真，炒股邊有可能賺到盡，連騰訊老闆馬化騰自己都估唔到升得咁癲，如果下下捉到個價位太靚，反而會令人懷疑係春江鴨啦。
余絲韻