Market Insight：航運股有機追落後

十月內地金融機構新增外匯佔款4,416億元人仔，足足比九月1,263億元人仔多三倍半，去到九個月新高，難怪人行公開市場操作，九月投放1,040億元人仔之後，十月已經轉為淨回籠1,575億元人仔，以吸走外來湧入的熱錢。

事實上，歐、日、英、澳央行近日有意無意表示放水動作會持續，相比出晒力撳住個CPI同埋愈壓愈升嘅樓價，中國貨幣政策取態同外圍有一百八十度分別，加埋人行行長周小川文章，啱啱提及未來擴大人民幣波幅區間，加快升值步伐的文意，睇怕今趟賭人仔升值熱錢會更有恃無恐，新一波升值潮唔使幾耐揭開序幕，趁三中全會概念炒得有點膩，看官們不妨研究吓得益於人民幣升值上市公司，例如航空股，話唔定下一浸升市會輪到佢地。

古勝冇點你2013/11/21

萬里長空

芬佬普遍未買完貨

周初過千億元成交勁升之後，一連兩日港股都以橫行去消化升幅，好明顯，大市等買貨基金經理要比食胡離場嘅多，形成個市調整壓力始終有限。

昨日恒指升43點報23,700點，以全日153點波幅，仲有710億元成交算係咁，50隻藍籌中32升15跌，兩隻內險股未肯抖氣，國壽（02628）以及平保（02318）再升0.6%及2.1%，阿里巴巴掌舵人馬雲深情告白，話要留港掛牌，隨時失而復得的港交所（00388）升3%報收138.9元，短短四日升15.5元或12.5%，早輪先話佢貴叫捧場客等撻落113元附近至諗，依家實行可以諗少一瓣。話口未完，叫大家留意同三中全會關連性比較低的落後股，昨日熱錢由三中全會改革概念股，分流到其他板塊，兩隻半新網股雲遊（00484）及博雅互動（00434）分別彈升4.2%及6.4%。

市帳率極低大平賣

工業、航運同造船股唔少見鑊氣，熔盛重工（01101）上升20.8%、中航工業（00232）上升17.1%、廣船（00317）升12.6%，三一國際（00631）升12.6%、中航科工（02357）升7.2%。古勝都有睇開熔盛，由招股價8元撻到落早排0.74元至反彈，話穩陣都係呃你，個人對佢有心理陰影就唔會介紹。

事實上，睇番反映國際乾散貨運費的波羅的海指數，近排波動程度媲美癲狂蚊型股，十月初見過2,100點樓上，昨日執筆時得番1,507點。話雖如此，航運股估值預視行業低潮，亦係不爭事實，即使龍頭股如中海發展（01138），股價由六月3元樓下彈番去5元，一三年市帳率講緊係得0.6倍，都未返回○七年金融海嘯低位0.7倍，遑論近十年平均值1.82倍。

短期業績見紅是市場共識，中海發展首三季勁蝕11.9億人仔，寶鋼上半年要減運費三成，影響是立竿見影，沿海的煤、鐵礦石運費仲係低企，船隊幾乎蝕住開工，明年業績唔見紅都偷笑。但都係同一句，勝在市帳率折讓夠大，正路當然追大孖沙蜂擁入去的券商或者內險股，但有畏高症兼有貪平習慣的，或者航運係你杯茶。

資源類股等住落鑊

大市幾個交易日就抽升千幾點，成交像樣，魚缸人氣當堂生猛番晒，唔單止重磅的中資金融股受基金追捧，估值低迷到痺的中字股都有資金流入「燒冷灶」。霸王集團（01338）昨日股價急升逾9%，收報0.5元，成交接近三千萬元。

事實上，今年以來，唔少估值超低迷的昔日基金愛股，如思捷（00330）、國美電器（00493），股價都成功展開翻身之戰，重新吸引基金經理注視。如今陸續見到有民企股亦開始扭轉弱勢，反映魚缸氣氛確實有所改善，且看幾時輪到批爛銅爛鐵，同埋煤炭股再接力加入戰團！

古勝