依家內地人好重視食物安全，聯想控股一早就睇中呢個商機，早就開始務農，繼今年五月推出嘅首款農產品藍莓之後，今次仲同前「中國煙草大王」褚時健合作推出生果組合「褚橙柳桃」。顧名思義，就係褚時健嘅橙同聯控董事長柳傳志嘅獼猴桃（奇異果）組合，仲係兩位商界大佬喺農業上首次合作，呢個生果禮盒就盛惠300幾蚊（人民幣‧下同）喇。
聯想推出第二款生果 ─ 奇異果，禮盒裝價錢由160至360蚊不等。高級副總裁陳紹鵬仲話，為咗同褚時健嘅合作，佢今年已經兩度去雲南拜訪褚老兼學習務農，其中一次仲係柳傳志帶隊添，柳總仲覺得同褚老志同道合，所以促成咗今次合作，又話未來不排除有更多合作喎！目前聯想喺農業嘅投資已超過10億，未來仲會有幾十億投入咁話。
講開又講，褚時健都好巴閉o架，佢係中國具爭議性嘅財經人物之一，原本佢係紅塔集團董事長，有「中國煙草大王」稱號，不過後來因貪污而坐監，出番嚟後就開始咗農業，同老婆承包荒山嚟種橙，舊年佢種嘅橙仲通過電商進入北京市場添。
余絲韻