「商品大王」羅傑斯（Jim Rogers），擅長研究商品、鍾情中國文化就眾所周知，但大家有冇發現佢其實都好鍾意戴煲呔，絲絲最近仲發現佢錄咗一段片教人打煲呔，展現佢鬼馬嘅一面！
羅傑斯話佢已經打咗煲呔好多年，因為佢發現煲呔比領呔平得多，而且冇咁易整污糟，於是愈買愈多，家中煲呔數目多到佢自己都覺得唔好意思，所以外國媒體網站Business Insider就請佢教大家點樣打正宗嘅煲呔！
影片雖然只有分半鐘，但都製作認真，搵埋背景音樂襯托。講返正題，羅傑斯話打煲呔第一步係將右邊領呔拉長少少，然後打一個普通嘅平結，再對摺右邊呔，用左邊呔繞一個圈，然後從後拉出，再調整一下即成。話時話，絲絲見好多煲呔已經現成，整好晒個形狀至賣，咁唔係仲慳時間咩？