絲絲講場：歐智華預告增添女大班

歐智華一年留港日子有限，今次忙完季度業績，仲抽時間出席婦女會晚宴，認真支持。同台有佢嘅得力副手香港區總裁馮婉眉及婦女會嘅董事。咁啱佢哋坐喺5號枱，同滙控嘅股票編號一樣，唔知係咪主辦單位別出心裁嘅安排呢。

滙控一直有支持英國婦女會，今次歐智華身體力行，雖然未有透露今次會喺晚宴慈善拍賣競投咩，但就百忙抽空出席，可能諗住親身出現支持下馮婉眉呢位銀行女大班。

歐智華喺台上分享，滙控成立首50年少有請女性員工，之後嗰50年開始請女性加入職級比較低嘅職位，直到最近呢20年先有更多女性加入，畀機會佢地發展所長。

滙控上年有22%嘅高級職位由女性擔任，歐智華話，集團會致力將佔比提升到25%，絲絲同一眾女banker一樣，希望多啲晉升機會，香港再多幾個銀行女大班。

滙豐北京分行進駐FFC

另外，滙豐近年中國業務愈做愈大，近日繼續喺北京「插旗」，咁啱北京最高嘅純寫字樓財富金融中心（FFC）落成，滙豐中國北京分行就做咗最大租客，滙豐銀行副主席兼亞太區行政總裁王冬勝（Peter）上個星期仲親自出席同發展商香江國際舉行嘅租賃簽署儀式添！