絲絲講場：Bitcoin新高 中國人有功

人幣兌換成交最旺

比特幣在Bitstamp交易平台對上一次嘅新高價就喺今年四月創出，當時成交價達259.34美元，但去到十月初，利用比特幣進行毒品、槍械等非法網上交易嘅美國非法網站「絲路」（Silk Road）遭查封，就拖累比特幣價格一度狂瀉逾三成。好彩比特幣喺內地受歡迎，多得內地粉絲撐番起個市場，內地首個人民幣兌換比特幣嘅交易平台「比特幣中國」交易量依家24小時成交量高達36,104枚比特幣，升上全球第一位，兼且拋離埋同佢一路拍住上嘅駐日本交易平台Mt.Gox。

內地玩家除咗喺網上炒比特幣，仲將比特幣應用到日常生活中，位於北京嘅酒吧Cafe Bar 2nd Place開始接受比特幣付款，成為內地首家接受比特幣付款嘅酒吧。比特幣風氣喺內地愈吹愈勁，話唔定遲吓會有更多商店願意收比特幣。