絲絲講場：熱刺Chirpy來港賀友邦
唔經唔覺，友邦保險（01299）已經喺香港上咗市三年，今日有位神秘嘉賓將會喺尖沙咀、銅鑼灣出現，同大家一齊慶祝友邦上市三周年，係邊個咁神秘？之唔係英超球會熱刺嘅吉祥物Chirpy囉！
或者你會奇怪，友邦同Chirpy有咩關係？原來友邦今年八月成為熱刺喺一三/一四年季度三場舉足輕重盃賽嘅球衣贊助商。熱刺係英超前列球隊之一，世界各地球迷有成1.8億人咁多，喺亞洲嘅粉絲都有超過8,000萬名，可見友邦連揀球隊都貫徹泛亞洲嘅策略！
上市三周年股價倍升
絲絲唔係足球迷，只係友邦嘅忠實粉絲！仲問點解？睇吓公司股價就知啦！翻查資料顯示，友邦一○年招股價19.68元，尋日收報39.45元，三年間股價足足升咗一倍，呢幾年股市咁波動，友邦股價依然節節上升，抽到新股又揸到依家嘅散戶仲唔賺到笑？
早排集團公布第三季業績，新業務價值增長高達26%，跑贏市場預期，唔少大行都唱好其前景，股價曾高見40.45元！
余詩韻