香港證券及投資學會每年都會頒授榮譽會員資格，畀一名喺業界擁有殿堂級地位，同協助香港發展成國際金融中心有傑出貢獻嘅人士。
今年呢個俗稱係證券界「終身成就獎」會頒畀邊個呢？絲絲同大家揭盅，答案係港交所（00388）前主席夏佳理，頒授儀式將於今年十月廿四日該會晚宴中舉行。
過去攞過呢個「終身成就獎」嘅人士，大家都耳熟能詳，包括周文耀、鄭維健、史美倫，李業廣、利國偉爵士、鍾悟思、梁定邦、沈聯濤等猛人。所以大家都對今年輪到夏佳理攞獎，不覺得意外。
事實上夏佳理做港交所主席時，有心有力，最為人津津樂道係佢積極推廣海外公司來港上市，不停飛到海外推廣，真係環繞咗地球唔知幾多個圈。佢又帶領港交所渡過百年一遇嘅金融海嘯，真係諗起一額汗。當然戰績仲包括收購倫敦金屬交易所！
夏佳理冇做港交所主席後，雖然少咗喺金融界曝光，但係大家可以喺十月嘅晚宴上再次見到佢嘅風采！
余詩韻