絲絲講場:上海大媽自貿區炒殼

「中國大媽」靠瘋狂搶金揚名國際後,最近愛上咗上海自貿區概念炒作。絲絲聽聞,一班上海大媽憑住地利之便,近排已經「組團」去自貿區,以兩萬人仔嘅年租金,租用虛擬辦公室註冊空殼公司。

現時好多大媽已經貴為自貿區內公司嘅法定代表人同總經理,淨係等緊區內虛擬註冊地址畀人搶晒之後,就可以將手頭上嘅空殼公司用個靚價轉手出讓。

組團炒樓 曾經輝煌

呢班掌管家庭財政大權嘅中國「中國大媽」,投資觸覺相當敏銳,喺內地早已經戰績彪炳,喺樓市最火爆嗰幾年,「太太炒房團」就聲名遠播,尤其係溫州嘅師奶兵團,更加畀媒體形容為「好似買菜咁買樓」。今次上海自貿區概念當紅,呢班中國大媽又點會錯過呢?

上海自貿區管委會承認,依家每日有接近六百間公司辦理註冊,相信當中應該有相當一部分係空殼公司。之不過,今次班上海大媽可能好似早排炒金咁,最後都要損手。

「寬進嚴管」或致損手

有管委會官員解釋,其實依家好多企業根本就冇明確嘅業務規劃,都係抱住註冊住先嘅心態來搞登記手續,加埋自貿區係採用「寬進嚴管」嘅管理模式,相信喺最近高峰期過後,企業註冊數量就會減少,冇可能出現「飽和到註冊唔到」嘅情況,所以想炒殼公司,真係分分鐘會血本無歸。

余詩韻