立法會議員張華峰自從同港交所（00388）行政總裁李小加喺「世紀飯局」嗌交後，不時都公開批評小加總裁，佢尋日又向小加發炮，話小加喺阿里巴巴來港上市呢件事上，冇捍衞投資者利益，仲好感慨話金融市場信賴嘅應該係一個良好嘅上市審批制度，而唔係一個高舉個人「英雄主義」嘅決策者！
張華峰同絲絲講，小加最近發表嗰篇網誌，雖然就雙重股權架構、合夥人制作多方面分析，但好明顯係藉「創新先生」、「未來小姐」、「務實女士」之口，支持「同股不同權」，為阿里巴巴上市開路，而且仲暗示香港「落後」，為未來進行市場諮詢鋪路。
張華峰話，依家香港喺「同股同權」原則下，小股東嘅利益尚且已經冇充分保障，香港唔應該接受「同股不同權」，佢仲「寸」以李小加嘅思維，會係個出色商人，但佢嘅言行卻為香港敲響警鐘。
張華峰話呢件事引伸到港交所有潛在利益衝突問題，喺龐大利益利誘下，香港正走向錯誤嘅方向，所以張華峰認為必須要重新檢視香港現有監管架構問題，上市審批制度有必要改革，加多啲獨立人士。
其實小加呢篇網誌，喺金融界真係議論紛紛，除咗惹來「股壇長毛」反擊外，唔少金融界人士都話，呢篇網誌有點「幫倒忙」，小加唔應該寫呢篇網誌，只會畀人更多攻擊嘅口實！唔知大家同唔同意？