美國聯邦政府局部停止運作已經第四日，共和黨企硬唔通過撥款案，總統奧巴馬慶到爆炸，不停搵啲巨頭出嚟講依家美國有幾大鑊，尋日輪到股神巴菲特，仲有前財長保爾森，仲講到好慶，「白癡」、「阿媽」都搬晒出嚟。
共和黨開出嘅條件，係要民主黨喺醫改讓步，奧巴馬表明冇得傾，保爾森亦力「撐」奧巴馬，睇死共和黨一味靠嚇，佢好抵死咁話「共和黨可能會拎自己阿媽嚟做人質威脅，但佢哋永遠都唔會傷害自己阿媽！」
相對保爾森，巴菲特「斯文」好多，佢淨係鬧共和黨「極度白癡」，佢哋以國債上限做威脅，堅決唔推醫改，呢啲招數唔可能持久。總括而言，兩位重量級人物，都認為共和黨議員為咗自己利益搞到國家陷入政治僵局好唔啱呀！
大家都記得，○八年始於美國嘅金融海嘯，當時人心惶惶嘅投資市場，冇人夠膽入市，但股神出手，買咗唔少美國股票，幫市場打咗支好勁嘅強心針，都算係美國嘅救命恩人，佢今次幫口，可能會幫奧巴馬贏番少少民意支持。
當然有人會話巴菲特只不過係無寶不落嘅投資者，當年佢透過巴郡向高盛豪擲50億美元，買高盛嘅認股證，近日行使咗，獲得高盛1,320萬股，估計佔高盛3%股份，巴菲特因而躋身高盛十大股東，帳面計大賺。
余詩韻