絲絲講場：美聯員工打泰拳壯士氣

美聯有個叫「美勵行動」嘅員工獎勵計劃，最近邀請專業教練坐鎮，傳授各式泰拳基本功，一方面培養運動習慣，另方面又可提升意志力，以最佳狀況應付工作挑戰。咁又係，政府辣招搞到地產代理冇啖好食，打吓泰拳宣洩吓都好。

董事會三師匯聚

絲絲睇過佢哋操練，出拳、踢腿、腳步等泰拳基礎技巧都做得似模似樣，跟住仲要打沙包、同教練單對單練拳等，睇落有啲電影feel。絲絲問過啲初學者，佢哋都話好享受練拳，又覺得公司嘅安排好好。

地產代理行業呢排都幾閉翳，政府嘅辣招，真係傷到好多人，美聯老友話，呢幾十年經歷咗唔少樓市起伏跌宕，惟有喺日常營運、管理架構方面與時並進，好似近排董事局都做咗唔少改動，最兩日委任咗專業建築測量師黃山，做獨立非執行董事，進一步強化集團企業管治，換言之，董事會已集齊律師、會計師及測量師，夠晒全面。