絲絲講場：一問阿里三巨頭鬥卸
阿里巴巴上市單嘢，搞咗幾個月仍然未講掂數，尋日港交所（00388）同深交所、上交所嘅合資中華交易服務成立一周年酒會，政府、證監會同港交所三大巨頭，包括陳家強、唐家成及周松崗難得同場，自然被追問阿里上市有乜進展，三大巨頭都不願評論，惟有不斷推搪，互相「交波」，最後仲借啲意閃咗去，真係近年難得一見嘅經典場面！
李小加帶人「遊花園」
之後傳媒惟有死港交所行政總裁李小加，見慣大場面嘅小加當然繼續帶人「遊花園」，話有責任保密詳情。佢仲話，市場有好多討論，港交所會學習聆聽同思考。對於「股壇長毛」David Webb建議應趁阿里事件將港交所嘅上市審批權交番畀證監會，小加就話依家本港嘅監管機構同法律相當好，睇唔到有需要改變。
上市委周四未必傾
講番阿里，今年係咪登陸香江，仲有幾日（九月三十日）就係死線，事關港交所規定十月一日後提交嘅上市申請最少要委任保薦人兩個月。不過，有消息就話，今個星期四上市委員會嘅例會，開會議程（agenda） 暫時並冇阿里呢單嘢，由於上市科暫未有提供文件討論，唔知屆時會唔會討論喎。
分析仲話有幾個可能性，之前港交所同阿里傾緊「減辣條件」，阿里仍在考慮當中未有回覆，所以上市委員冇得討論，或者遲啲再傾。
有接近上市委員會嘅人士就話，單嘢唔係緊急到咁，而且喺公眾利益角度，都唔需要將事件提升到咁緊急去處理咁話。事實上，有接近交易所嘅人都話，交易所唔係着眼一單生意，而係關心未來五至十年嘅發展。
有熟悉新股運作人士就估，阿里可能呢個月尾入表，再同監管機構談判，明年上市。但如果明年都上唔到，就可能真係要去美國上市喇。
余詩韻