絲絲知道投行係好多大學生心水嘅暑假實習地方，但好工自然多人爭，高盛投資銀行部門今年暑假請咗350名「實習」分析師，大家唔好以為咁多位就唔使爭呀，超過1.7萬人申請呢份工，計落即係一個位有成45個人爭。
嘩，錄取率得2%咁低！若以今年哈佛大學嘅錄取率5.9%比較，原來做高盛實習生比入哈佛難三倍。
錄取率咁低，真係精英中的精英先可以留低。高盛總裁兼首席營運官Gary Cohn晒命話，高盛吸引「天才」冇難度，就算高盛畀嘅人工低啲，都一樣可以同科技界爭到啲又後生又醒目嘅人才。佢又話高盛全職更加係爭崩頭，一年收到5萬至7萬份申請，真係接信都接到手軟。雖然經歷金融海嘯一役，高盛嘅公眾形象唔多唔少都打咗折扣，但唔少畢業生依然夢寐以求入高盛打工。
高盛實習生為期10個星期，一開始會參與迎新活動，熟習一下公司嘅文化，知道作為高盛一分子，究竟有咩責任同好處先，咁絲絲就祝各位高盛實習生開工大吉啦！