周文耀同許照中兩位老行尊，喺證券界打滾幾十年，大家老友鬼鬼，行善一條心。早幾日絲絲喺一個慈善活動見到兩位盛裝出席，打晒煲呔，顯然係隆重其事。周文耀除咗專注數碼港外，近年做咗國際培幼會（香港）主席，行善對佢嚟講，係生活嘅一部分。
絲絲同佢傾咗好耐，問佢助養咗幾多個小朋友，佢話好多個，莫非有幾十個？佢話冇咁誇張，但都有十幾個，而且唔係齋畀錢就算，佢時不時做探訪，睇下班「仔女」嘅生活需要。以佢行善嘅投入程度，助養數目去到幾十個都唔奇。
同場出現嘅六福金融主席兼行政總裁許照中，大大話話入行四十年，真係乜風浪都見過，絲絲見佢清減咗，佢就呻冇啖好食，皆因港股延長交易時間後，佢唔可以四圍食，成日要幫襯嗰間由香港仔成名，殺入市區嘅麵店。