資深經紀張天生出晒名識飲識食，唔講唔知，原來佢仲係才子一名，閒時最鍾意吟詩作對，最叻就係將古代詩人嘅名作，套入自己嘅創作當中，聽過佢自創詩句嘅人，無不豎起手指公，大讚「青出於藍」呢！
尋日張天生食飯時又詩意大發，即席自創咗兩句詩句嚟「宴客」﹕「古稀歲月入花叢，恰似桔樹戀寒冬」。但呢句絕對唔係張天生嘅心聲，佢笑言，自己嘅人生宗旨係「及時行樂」！記得張天生早前喺生日會上就公開稱讚太太畀佢自由，絲絲就諗，張天生能有如此通情達理嘅太座，真係羨煞旁人。
講番依家經紀最關心嘅期貨夜市，絲絲聽聞證監會都知中小經紀兼顧夜期困難，「隻眼開隻眼閉」，唔會硬性規定夜晚一定要有負責人員（RO）喺經紀行當值，只要隨時可以聯絡到RO就可以了。港交所（00388）亦會簡化緊急中心嘅運作，萬一經紀行停電「當機」，都可以即刻派人去到中環嘅緊急中心繼續交易。市場人士話，依家個緊急中心，辦理手續繁複，最少要搞半個鐘至可以做嘢！
證監會尋日亦發咗個通函畀經紀，同意將晚上成交嘅買賣，同下一個交易日正常交易時段內成交嘅買賣，合併申報持股量嘅規定。絲絲認為，凡此種種，都係為咗夜期大開方便門，監管機構都算用心良苦！