長實（00001）執行董事趙國雄金句多多，絲絲尋日同佢食飯，席間講開行商場買嘢嘅體驗，趙國雄居然爆咗一句，話「其實我唔鍾意去百佳買嘢」，相信都冇乜人唔知百佳母公司係長和系。趙生咁講，唔通想倒自己米？
事緣尋日長實旗下嘅置富產業信託（00778）舉辦開市聚餐，身為置富主席嘅趙國雄，忽然好感慨咁話，置富由新加坡上市至今進入十周年，咁多年嚟置富都有盡「企業社會責任」，所管理嘅商場除咗有連鎖集團租用之外，置富都盡量保留小商戶同埋特色店舖，因為佢睇重購物嘅體驗，就係人同人交流同溝通。
跟住佢仲話自己唔鍾意幫襯百佳，全枱飯腳嘩然，幾乎噴飯。佢解釋話，現代嘅科技太進步，「掃Barcode」太快，畀錢可以拍卡搞掂，同收銀員冇時間溝通。唔似得廿幾年前，收銀員要將貨品價錢打入收銀機，大家都可以有多啲時間傾兩句。
可能佢都覺得淨係講百佳有啲唔妥，所以即刻又話自己唔鍾意去某大連鎖快餐店食飯，又係因為要短時間內要點餐拍卡畀錢，缺乏溝通。