啱啱卸任美國財長嘅蓋特納去向終於曝光喇！原來佢有兩項大計，第一樣係寫書，主要講述美國喺○八年點樣應對金融海嘯，而另一樣就係加入非黨派智囊組織外交關係委員會擔任全職特聘研究員！
絲絲聽講蓋特納本書主要會講佢喺過去四年擔任財長，同埋喺○三至○九年期間做紐約聯儲銀行行長嘅時候所經歷過嘅事。
外界普遍覺得蓋特納本書會幾好賣o架，話晒佢都係總統奧巴馬身邊長期夥伴，以第一身參與應對危機嘅決策問題、見證《沃爾克規則》嘅通過、同埋國會談判債限問題等等，可能有好多料爆o架嘛！其實唔知係咪做過財長嘅都特別有鋪寫書癮呢？因為前財長保爾森、奧尼爾同埋魯賓喺辭官後都有出書！
至於加入外交關係委員會其實都唔係蓋特納嘅第一次，佢○一年喺嗰度做過，而呢個組織專門分析包括國防、環境、經濟同反恐等政策問題。有熟悉蓋特納嘅人話，蓋特納咁樣做除咗可以躋身美國權力圈，仲可以抽多啲時間發展佢嘅興趣，好似係發表演說等。
外交關係委員會對於蓋特納「回巢」表示歡迎，而蓋特納其實喺嗰度都唔使愁無人陪，因為佢好多共事過嘅同事都喺嗰度做，包括佢以前嘅啟蒙導師兼前財長魯賓就係喺嗰度做聯席主席。