絲絲講場：衞訊廣告收得 COO有功
衞訊近期嘅新廣告「爸爸，點樣先可以將啲資料由部舊機搬落部新機度呀？」相信大家都唔會陌生。衞訊嘅營運總監鄭家俊（Desmond）日前同絲絲分享，話個廣告雖然唔係拍咗好耐，不過嗰兩日兩夜佢全程同拍攝團隊一齊並肩作戰，所以都咪話唔辛苦，不過見到觀眾反應咁好梗係開心番晒啦，仲大讚入面飾演爸爸嗰位演員好戲添！
Desmond話，今次嘅廣告除咗喺電視播放之外，完整版仲喺網上同戲院播放過，佢仲向絲絲解釋話，點解喺電視度見唔到長版，並唔係因為加插咗啲槍擊元素，純粹因為時間太長電視台收費好貴咁解。
有份贊助體育盛事
絲絲好奇又問，廣告有無諗過搵明星助陣拍攝？Desmond笑稱「我哋仲係中小型企業嚟咋」，同埋普通演員可能仲配合到公司想帶出嘅主題啦。除咗呢個廣告，衞訊其實對體育節目都好捧場，好似剛於舊年嘅倫敦奧運，以及廣受球迷歡迎嘅英超直播，佢哋都有份贊助落廣告。
不過，Desmond話今年策略可能有變，至於點變法，就同絲絲賣個關子先。