絲絲講場：金融過山車神都玩死
上年環球金融市場全年都好似坐過山車咁，經歷咗好多起跌，其中歐豬五國仲一直瀕臨破產邊緣，搞到股市、匯市都鬼咁動盪。美國財政懸崖亦搞到舊年環球股市慌失失咁！總之，股市升跌就係永遠都估唔到嘅！
巴菲特低估債券回報
好似絲絲總結番華爾街大行同神級人物舊年年頭嘅預測，發現大部分都睇錯市，就連跟股神巴菲特嘅投資方向，回報亦會少咗！
股神巴菲特上年二月同股東講因為高通脹同低孳息率嘅關係，股票回報會較定息債券吸引，點知美國舊年通脹只有2%左右，美國公司債券仲錄得11%嘅升幅，真係自打嘴巴！
普爾遜押錯歐元大跌
同樣係神級嘅普爾遜，佢旗下管理190億美元資產嘅對沖基金，佢上年揚言歐元會大跌，而歐元區亦難以解決債務危機，但經過美國聯儲局同歐洲央行齊齊使出無限量寬政策刺激後，標普500指數不跌反升16%。而估錯市嘅仲有摩根士丹利嘅美股分析師Adam Parker，佢亦預測受到美國總統大選、中國增長放緩同歐債危機影響，標普舊年會跌7.2%至大約1,167點。但後來聯儲局宣布維持低息環境至一五年、繼續發債，令股市升呀升，最後一個交易日仲收報1,426點，係自○三年以嚟超出預測最多嘅一年！
霸菱資產管理分析師Khiem Do就話，過去二、三十年分析師一向都被訓練根據經濟數據、債務表等預測大市走向，但舊年有特別多政治因素影響，令佢哋難以估計政府嘅下一步點走，結果齊齊捉錯路！絲絲希望今年佢哋可以估準啲，造福一下啲小股民啦！
余絲韻