中國過去好多年都係靠低人工吸引外資設廠，先有咁快速嘅經濟增長，亦都得到「世界工廠」嘅稱號，其中，幫蘋果公司做代工做到出晒名嘅富士康就極具代表性，但係風水輪流轉，中國近年人工係咁升，連富士康佢哋好似都開始頂唔順！
絲絲八到，富士康諗緊去美國開廠，係，你冇睇錯，係美國！佢哋仲已經有心目中嘅城市，考慮中嘅有底特律同洛杉磯。
不過，美國始終唔係中國，富士康好難照抄內地嗰套，美國工人先至唔會同你一隊兵咁，困喺間連埋宿舍嘅廠裏面「默默耕耘」，靠對手嚟嵌機；所以消息話，美國新廠會以自動化生產為主，主要係生產平面電視。仲有傳聞話，呢間廠生產嘅第一個產品，會係唔少「果迷」都好期待嘅iTV喎！
聽到呢個消息，最開心嘅可能係啱啱連任成功嘅美國總統奧巴馬，事關呢位總統任內一直都話要將製造業職位重新帶返去美國，上個月競選嘅時候仲應承過未來4年要創造100萬個製造業職位添。睇嚟佢要快啲搵富士康老闆郭台銘斟斟，叫佢快啲過去開廠先得！
余詩韻