當年嘅手機王國摩托羅拉畀蘋果、三星逼到「冇碇企」，上月終於全球大裁員，南京就有500個科研人員被炒，名副其實「冇得撈喇」，但畢竟系出名門，聯想集團（00992）就當正秋季促銷爭住尋寶，呢啲咪皇帝女唔憂嫁囉。
聯想今次認真豪氣，一舉請咗40名前摩托羅拉員工，有部分尋日已經正式返工，聯想移動終端事業部副總裁陳文暉，大讚佢哋個個都係「無價之寶」，又索性將成立第四個手機研發中心嘅地點由武漢搬去南京，目標一年內請夠100人，主要針對國際手機市場研發。前摩托羅拉員工對研發軟件同埋多語言作業環境有晒經驗，唔怪得雙方一拍即合啦。
陳文暉指海外市場嘅智能手機毛利率比內地高，拓展初期唔睇銷量，「最重要都係建立生意模式先，將服務、銷售、市場推廣等組合起嚟。」作為海外市場試點，今年聯想會先開拓印度、印尼、菲律賓、越南同埋俄羅斯五個新興市場。內地方面，聯想上月市場份額穩佔亞軍，僅次三星，連蘋果都唔夠佢哋爭，唔知聯想客場成績又有冇咁標青？
余詩韻