踏入第四季香港銀行股表現一枝獨秀，以恒生銀行（00011）為例，股價屢創一年新高！
一直都知道恒生受歡迎，因為佢派息穩定，同埋過去股本回報率一向都跑贏本地同業，而當中主要有賴持股──興業銀行喺內地高速增長。不過，由於恒生唔參與興業早前配股行動，令其持股比例被攤薄至10.7%，估計第三季完成配售後，來自興業股本回報將會下降。
加上攤薄後，恒生喺興業董事局影響力或下降，意味將要修改入帳方式，唔能夠再將興業視為聯營公司，而轉為屬於財務投資。咁樣可能會對恒生盈利同股本回報率，因為如果興業股價進一步下挫，作為財務投資形式入帳的話，恒生將要跟住佢持股市值作出減值撥備，大大影響張成績表。
之但係，似乎恒生股價對呢件「負面」消息免疫。咁又係，佔一成左右投資，相比其他公司所面對緊風險系數，又真係小巫見大巫。再加上本身恒生只專注本地市場，歐、美、中呢個「經濟三煞位」，佢唔係首當其衝，的確係一個幾好「泊」錢選擇。
依家仲落場下注資金係屬於「無得揀」類型，如來自股票基金，佢哋唯有揀番低風險公司泊住先，起碼跌時唔會跌太多，仲有穩定派息，但一切還要視乎市場風險胃納。繼續追蹤，出發！
香港大學電子金融服務榮譽助理教授 徐燦傑