曾經係內地公募基金一哥嘅王亞偉，自從由華夏基金辭職之後，市場對佢嘅去向有好多傳聞。不過大家唔使再估估下喇，事關佢已經喺深圳前海正式註冊咗間叫「深圳千合資本管理」嘅私募基金公司，好快就會重出江湖喇。
根據公開資料顯示，呢間私募基金註冊資本有1,000萬人仔，係由王亞偉一個人出資，仲做埋總經理同執行（常務）董事。不過前海開發啱啱開始，間公司都仲未定到辦公地點，未正式運作。
市傳王亞偉要求客戶最少要有2,000萬人仔，都有人話其實起步門檻係500萬美金，仲要投資私募嘅錢只係佔個客個人資產嘅5%，換句話講，即係目標客戶最少要有幾億身家。不過絲絲就覺得呢個要求都唔算誇張，睇下佢嘅往績，做基金經理14年，可以將個客1蚊嘅投資變成28蚊，相信有大把追隨者會肯將錢交畀佢打理。