股市成交低迷，經紀無啖好食。剛剛上任冇耐嘅立法會金融服務界議員張華峰「急經紀所急」，立法會議員張「櫈仔」都未坐暖，就即刻「做嘢」，今個禮拜六（20日）就率先連同四十幾名業界代表去前海訪問，了解吓當地最新發展，最重要梗係睇吓有乜商機，例如爭取本地券商喺前海幫內地同胞開股票戶口。
今次訪問係由證券學會舉辦，張華峰係訪問團嘅顧問，證券學會會長李細燕、該會副會長、理事，同埋部分分析員都會跟大隊去前海。
雖然爭取畀本地券商進入內地市場，唔係短期可以做到嘅事，冇可能解決經紀「燃眉之急」，但依家經紀單靠人客買股票賺佣金收入，邊可能生存到吖，經紀業務多元化已係大勢所趨！絲絲亦都聽聞證監會都鼓勵啲經紀拓展其他業務，唔好「獨沽一味」只做股票，好似做埋資產管理咁。
除咗幫經紀發掘商機外，張華峰早已定下三大目標，包括檢討港股午休時間、推行佣金二級制、同檢討期指夜市，準備幫業界打場硬仗。
自從張華峰當選議員後，有資深經紀同絲絲講，業界噪音反而少咗，一來大局已定，二來業界都想睇吓佢做成點。佢哋都希望經紀出身嘅肥佬張，同聲同氣，明白經紀苦況，幫經紀出頭！
余詩韻