Market Insight：中信三寶平得離譜

事實上，人行除逆回購操作之外，一直留有一手，未有跟隨歐美央行採取更鬆寬的貨幣措施經已接近三個月，十年一次領導人換屆在即，在通脹回落至2%安全線下，股市對人行「鬆手」營造經濟復甦氣氛的預期，不斷升溫，相信這情況有利中資股延續近期的報復式反彈。

港股連升六日，沽空佔大市成交比重連續四日低於9%，反映被迫埋牆角的淡友，已開始無還擊之力。基金正面對錢多貨少狀況，近幾日所見，無論基金經理或散戶，都樂於一齊癲，趁在十八大前利淡政策真空期，大玩扑傻瓜，凡見早市風吹草動，無論二、三抑或四線股，即刻見買盤蜂擁掃貨。

放大圖片

放大圖片

期待東風最後召集

好似早兩日推介的東風集團（00489），古勝一直等升穿10日線確認轉勢才跟進，打算確認企穩本周高位10元後就郁手，好衰唔衰轉個頭已被大量買盤吞噬，股價一去絕塵，若非「最後一trade」嘜低10.32元，應可站穩全日高位10.36元收市。

昨日東風有新聞，上海A股上市的附屬公司東風汽車，受中日領土爭端升級影響日系車輛銷售，九月銷量1.8608萬輛，按年跌29.3%，相信面前唯一唔敢上車的理由，係怕東風短期會發第三季盈警，萬一真係咁好彩壓低股價，是趕唔切上尾班車者的最後機會。

內地工業生產可能在第三季見底，至於久沉的鋼鐵股都開足引擎追落後，昨日呈現雞犬皆升情況，最誇張係重慶鋼鐵（01053），十年唔發市，一升就21.7%，馬鋼（00323）及鞍鋼（00347）都分別升9.3%及6.4%。

鋼鐵股馬鋼略秤先

事實上，九月份內地冷及熱軋鋼價格開始反彈，儘管需求依然疲弱，基金經理都炒咗至算，懶理行業今次係真見底抑或假復甦。

上述三隻鋼股一二年預期市帳率分別係0.49倍、0.53倍及0.58倍，比四年歷史市帳率0.55倍、0.87倍及1.12倍，分別折讓10.9%、39.1%及48.2%，再加埋人性化一點的考慮，好似產品需求及價格，以及有足夠流通量比基金上落車，博反彈首選應該係馬鋼。

倘若鋼鐵股都嫌大路，不妨諗諗中信系，表面上中信泰富（00267）有重組消息公布，可能出售澳門電訊兩成股權炒高，近年公司轉型，非核心業務陸續剝離，主戰場早已是澳洲鐵礦石生意，自QE3放水後，弱足一年的鐵礦石價格有死灰復燃迹象，即使旗下礦場距離賺大錢，仲係十劃未有兩撇，睇番現股價市帳率僅0.44倍，居然殘過近一兩年業績都要見紅的鋼鐵國企股，難怪惹來一眾投機者跟風炒上。

再睇同系中信大錳（01091）及中信資源（01205），分別升11.2%及5.5%，大錳上市之後，幾乎無段好睇，上半年電解錳跌價一成七，業績立即見紅，過去成交疏落，屬可炒欠穩一類，只適合大大聲細細注。反而中信資源基本因素唔錯，哈薩克油田及澳洲氧化鋁項目進入回報期，最重要係估值唔貴，昨日股價大成交配合，逼近八月份阻力位1.16元，升穿後見1.3至1.4元機會唔細。

水泥股宜分注入市

領導人開腔話會將穩增長放喺更重要嘅位置，預計政府將加快投入各項固定資產，帶動建材市場需求回升。昨日美銀美林就發報告，話水泥股嘅前景由審慎轉為正面，其中首選為中國建材（03323）及山水水泥（00691），昨日股價分別升7%及5%。古勝就認為，水泥行業係有機會完成尋底，但復甦之路相對平穩，唔會一下子彈跳式急升，所以買貨唔使太心急，宜採分注入市策略。

古勝