絲絲喺上海嘅老友話，呢排佢自己興用BMW返工，絲絲讚佢叻仔，代步車愈換愈靚，講講吓至知會錯意。佢所指嘅BMW，係巴士（bus）、地鐵（metro）同行路（walk）嘅代號，唔係汽車牌子。
內地好多城市同香港一樣，市民要捱塞車之苦，上海喺呢方面都出晒名，為咗避開交通擠塞，同埋停車費高昂嘅問題，有唔少上海人已經放棄咗揸車返工，轉以巴士地鐵代步，喺上年，就有47%上海打工仔選擇咗用公車返工，仲有上升趨勢添。
眾所周知香港公共交通嘅方便程度，喺世界上數一數二，原來上海都唔輸蝕o架，依家上海有50個公共交通樞紐，聯繫住208條巴士線同12條地鐵線添！上海運輸當局表示，為咗照顧不斷上升嘅需求，到咗一五年底，巴士線總長度將會由依家嘅162公里，擴建到300公里。
有上海嘅打工仔就話，改搭地鐵返工之後，每日用喺交通嘅時間減少咗40分鐘，每個月更加可以慳600蚊人民幣停車費同油錢，計絲絲話，巴士、地鐵經濟又環保，香港都要奉行BMW文化先得。