香港租金「乸脷」，真係扼殺咗好多企業，惟有避到上樓，做樓上舖，之不過，都唔係一了百了o架，海通國際證券（00665）都話畀高昂租金逼到埋牆角，好彩間間舖都有錢賺。
海通執行董事兼營運總監潘慕堯（Patrick）同絲絲講，依家租金成本好貴，嚟緊海通都有兩、三間證券分行要續租，加租升幅高達百分之二十至三十，都真係加得幾惡o架！現時港澳共十三間證券分行，大部分都係樓上舖，全部月租成本都要二十萬以上。
美國推QE3（第三輪量化寬鬆），股市氣氛呢排好番啲，散戶多啲炒賣，證券行嘅收入自然增加。Patrick話佢哋間間舖都有錢賺，唔講唔知，原來咁多間舖之中，元朗區嘅生意最好！Patrick又話，將軍澳愈嚟愈多中產崛起，如果機會來臨，唔排除會喺將軍澳開設第十四間證券行。
近期金魚缸另一特色，係「殼股」潮疑似翻生，佢就話：「任何有得做嘅生意都會嘗試做，只要機會到，我哋唔排除會有收購項目，現時公司手頭上都處理緊七至八個IPO，主要係金融同消費行業等，不過呢啲IPO可唔可以喺第四季上市，就要視乎市場氣氛喇！」