雷士照明（02222）創辦人吳長江係咪可以回朝呢件事，前日終於突破悶局，公司畀吳長江同一批人士，成立一個臨時運營委員會，吳長江仲即刻開工。線人報料，話吳長江過到六個月「試用期」，就可以正式入番board，絲絲搵過雷士嘅人，想確認吓堅定流，最終冇人答到。
雷士為保市場信心，尋晚連夜出招，發公告強調雷士事件塵埃落定，又話目前雷士已全面恢復正常運營，八月份雷士嘅LED產品銷售，亦氣勢如虹，有幾千萬咁話。吳長江更加係一副戰鬥格，尋日朝早即刻首次以運營委員會負責人身份，喺重慶召開「雷士照明2012年秋季營銷會議」，向整體運營商保證，雷士家陣已無後顧之憂。
講返「試用期」呢個傳聞，線人言之鑿鑿咁話，呢個安排係現任董事長閻焱同吳長江達成嘅協議，如果半年「試用期」公司業務理想，吳長江仲會正式重返雷士。
雖然線人無詳細講個協議其他內容，但好明顯雙方都唔想公司有事，話到尾閻焱代表嘅投資基金都唔想雷士沉船，所以決定畀吳長江返嚟搞番盤生意。吳長江喺呢場「生死戰」有班兄弟撐住，佢周一就喺微博透露，「跟公司兄弟們吃飯，所有嘅人都向我保證最後四個月一定完成公司任務」，仲話高興到自己要飲番杯。
呢單爭拗打破悶局，雷士股價都有反應，一度逆市漲16.92%，收市時都升7.7%，可惜雷士經過呢幾個月股東爭拗已經好傷，三位董事接連跳船，包括獨立非執行董事Karel Robert den Daas、Alan Russell Powrie同非執行董事許明茵，仲有啲追隨吳氏多年嘅高管、被嚇走嘅原料供應商等，都咪話唔閉翳。
余詩韻