Money Views:私有化中尋吉兆

大市在萬八至兩萬點之間,上上落落近三個月,成交愈玩愈縮,真係睇見都心傷。根據邢理強以往經驗,缸邊客老早死心離場,為大股東私有化提供絕佳時機。然而,最近兩宗私有化先後被股東否決,失敗原因來來去去都係嫌錢少,大股東出手唔夠豪,今時今日超低息環境,小股東持貨成本極低,更具條件拉長戰線,同大股東周旋到底。

今日散戶實在比以前精明得多,即使長期悶局難買難沽的亞洲衞星(01135),○七年經歷私有化滑鐵盧,沒有令大股東打消盡收天下兵器的意圖。四月捲土重來,更慷慨地由最初出價22元,提升至23.5元,一樣遭街外股東大比例否決,皆因散戶都見,去年末期息大減八成五保留更多現金,亞衞手頭現金已達22.7億,同大股東24億的出價相差無幾,同銀行借短期貸款,轉頭收歸己用之後還錢,根本唔使幾多銀両,就可將餘下兩成五股份收回,但挑通眼眉的小股東又點會畀呢個如意算盤打響。

另一私有化失手的星獅(00535),同樣長年交投疏落,失去集資功能,也沒有好好把真正價值反映在股價身上,因此吸引兩大股東打主意,嘗試刀仔鋸大樹,一旦成功私有化,5.5億成本收回街外股份,完全掌控近24億資產的經濟誘因,最終也被街外股東投以反對票作結。

逾半股價低過資產值

大股東不厭其煩,碰壁機會極高(老實說要九成投票股東通過實在唔容易),仍身體力行去證明抵買,多少道出今時今日股市處處是寶,綜觀今日市帳率低於1倍股票有884隻,即是超過一半上市公司股價低過其資產價值;低於五折,市帳率0.5倍樓下,更達437隻之多,同海嘯時不相伯仲。愈多私有化出現,向來是股市近中期低位一大徵兆。

INVEST 邢理強

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!