依家市場信心紙咁薄，上市公司一有咩風吹草動，個股價就好容易畀人舞高弄低，絲絲講緊嘅係中國金石（01380），星期三仲爆升五成幾，尋日晏晝復牌就倒插一成半，原來罪魁禍首係公司嗰份通告！
前日因為股價爆上，收咗市中國金石就發咗個「例牌」通告，話唔知股價波動嘅原因，又話目前無收購或者變賣事項，絲絲手痕撳埋英文版嚟睇啦，點知竟然有「大發現」，就係同中文版唔同！根據英文版嘅原文，就話「目前有收購或者變賣事項」，咁就出事啦！
不過，好彩喺尋日開市之前，公司已經發現咗呢個「big mistake」，急忙補飛，澄清英文嗰份通告打漏咗個「no」字，搞錯咗！絲絲覺得呢啲「例牌」通告行文其實「too simple」，份份一式一樣，個重點就係有無個「no」字啫！
講真，上市公司通告出錯絲絲都司空見慣囉，好似中國香精（03318）咁，尋日發出澄清通告，原來係日前通告搞錯董事王明凡嘅Title，由董事變咗做主席，而呢趟係中文版出錯，英文版就啱，同中國金石剛剛相反！