唔經唔覺，自從王潔鳳（Linda）離開星展香港過檔平保（02318）後，佢哋零售銀行業務總監個位就懸空咗近兩個月，依家終於有新消息，星展將會由大本營新加坡調任潘燕明（Pearlyn）嚟香港，出任星展香港董事總經理兼零售銀行業務總監，仲會喺下個星期正式上任添。
大家可能覺得Pearlyn好熟口熟面，因為佢真係好勤力，上個月星展喺又一城開分行時，當時仍未上任嘅佢已經嚟咗香港，仲親自落去分行度出席開幕儀式，順便熟悉環境同認識新同事添。
其實Pearlyn都算係星展嘅老臣子，○三年就加入星展，調任香港之前係星展豐盛理財嘅區域主管，喺零售同埋財富管理業務方面有多年經驗，相信香港嘅新職務佢都會好快上手。