剛剛睇到一個叫做2012年「理財知識水平指數」嘅調查，調查結果指出，原來我哋香港人嘅投資知識水平係亞太區之冠！呢個調查由2010年開始做，一年一次，今次調查，就發現香港人嘅整體理財知識亦由舊年嘅第六位，顯著攀升。
個調查係MasterCard做嘅，佢哋今年4月至6月喺亞太區14個市場訪問咗6,904個消費者，年齡介乎18至64歲。調查主要分開三方面：基本財務管理能力、財務策劃、投資知識。香港整體理財知識水平得分係71分，同澳洲、新加坡並列第三；投資知識水平方面，香港更以68分排亞太區第一，「監測投資」同「分析投資產品適合度」兩方面，香港嘅得分都高過亞太區平均數添。
至於我哋嘅祖國，整體理財知識水平雖然排尾三，得嗰第12位，攞64分，低過14個地區平均數嘅67分。不過，據萬事達卡港澳區總經理孫奕朗話，中國嘅理財知識已經有改善。至於台灣，就爭氣得多，整體理財水平由前年第五，一下子爆上第一。
值得一提嘅係，14個地區裏面，有10個地區嘅女性，包括香港，都比男性擁有更高嘅理財知識水平，尤其以新興市場嘅女性更為出色。好似菲律賓咁，當地女性嘅理財知識水平就比男性高出9%。
不過呢樣唔使調查，根本就係common sense，菲傭根本撐起菲律賓嘅經濟咁滯啦！
余詩韻