於今個月下旬約滿嘅港交所（00388）上市科主管狄勤思，佢嘅去留問題終於明朗化！港交所尋日公布，已經同狄勤思續約一年，任期直至明年七月。
大家一定會好奇，點解只續約一年咁少？港交所話，狄勤思即將屆滿交易所標準退休年齡六十歲，未來一年內，狄勤思除繼續負責上市科主管嘅日常職責外，另一個重要任務就係協助港交所搵繼任人選，並且協助繼任人順利接任。
講真，一年時間真係唔算多，事關上市科本身已有大把工作要跟進，好似窩輪改革、海外公司來港第二上市同中途停牌諮詢等。依家仲要搵埋接班人，睇嚟，狄勤思未來一年真係會忙到出煙！
再講，上市科主管呢個位都幾難搵架，既要守住監管嘅「防線」，又要唔窒礙市場發展，呢個「平衡」絕對不易呢！
講開港交所，呢排股價係咁瀉，尋日僅險守「紅底股」，但瑞銀再「睬多腳」，話港交所依家嘅營運環境係咁多年以來最艱難嘅，事關港股成交流動速率，跌至六年來低位，加上暑假成交又例牌淡靜，維持「沽售」投資評級，同目標價一百元。
好多市場人士都看淡港交所，倫敦金屬交易所又就快開股東會通過收購，好多人都估佢可能好快失守「紅底股」！