本港手機商大打4G爭奪戰，祖國嘅三大電訊商嘅3G爭客戰亦打得火熱，繼中電信（00728）搞「十送一」嘅iPhone團購優惠後，聯通（00728）傳將出招，把3G服務入門收費降至低於36元（人民幣‧下同），三大電訊商嘅3G減價戰進一步白熱化。
內地3G服務由鬥iPhone，到鬥價位不足1,000元嘅中低檔智能手機，正好證明3G服務已經全面走入大眾化市場。聯通嘅3G入門收費會跌到乜水平，仍有待公布，但大陸已有好多風聲漏出嚟，仲話係來自聯通嘅內部消息，傳聞中嘅收費，會以2G介乎20至30元嘅ARPU做參考標準，呢個價錢就可以吸引更多2G用戶加入3G行列，從而提升聯通3G嘅上客速度。
其實隨着3G服務嘅全面普及，月費門檻下調原本無可厚非，惟有投資界友好就同絲絲講，最令人擔心嘅係ARPU下跌同時，電訊商嘅手機補貼及上客成本亦同時上升，電訊商未來幾季嘅業績隨時會因而受負面影響。
3香港賣埋iPad
講返轉頭香港手機網絡商近年搶客，已經唔多用「蝕入肉」方式打價格戰，但喺手機補貼方面卻下不少工夫，好似和電香港（00215）旗下3香港，尋日就宣布同蘋果公司傾掂數，明日開始正式加入銷售新一代iPad行列，改變過往iPad只喺本港指定分銷商銷售嘅慣例，絲絲八到，3香港亦將為客戶提供零機價上台優惠，為吸客再開新戰線。