facebook（fb）上市，吸引晒全球嘅鎂光燈，投資界同埋粉絲對佢好有期望，點知第一場嘅推介會就有啲甩轆，兼惡評如潮，惟有寄望第二場推介會，攞番啲分啦，點知都係瑕疵多多。
絲絲聽有份去嘅人講，話今次安排好過上次，除咗取消播片環節，仲花多咗時間回答提問，唯一唔好嘅就係朱仔無出席囉！搞到班粉絲大失所望！
今次路演改咗喺朝早舉行，參加者嚟到可以免費食早餐，包括煙三文魚、百吉圈同埋生果，算係咁喇，但朱仔無到點都好似差緊啲嘢。絲絲聽人講，朱仔唔嚟係因為走咗去見啲大型機構投資者，咁即係大細超喇！剩番營運總監桑德伯格同埋財務總監埃伯斯曼主持場騷，今次佢哋識做喇，答多咗問題，好似fb嘅流動電話策略同埋點樣運用用戶資料擴大廣告業務等，你慌佢哋唔係驚啲人再話佢哋場騷無料到咩！
有參加者話專登冒雨嚟一睹朱仔風采，話朱仔想向公眾集資，好應該出席公眾活動，嚟到答吓啲行貨問題都好過無呀，作為一個投資者都想聽吓公司最大揸fit人講嘢o架。雖然班粉絲一肚怨言，但表示fb估值吸引，增長型投資者勿失諸交臂。
又有參加者話，其實朱仔嚟唔嚟都無所謂，由着得「四四正正」嘅桑德伯格同埃伯斯曼講發展大計，感覺都唔錯，話咁先似生意人喎，咁言下之意咪即係話朱仔前日衣着「親民」過火啫，朱仔唔出席推介，抵佢畀人彈喇。