美聯（01200）呢排有好多高層變動，副主席兼執行董事黃錦康（Albert）原本計劃喺今個月二十五日做埋個股東大會之後先全身而退，正式同美聯畫上個句號。不過，事情又有新變化。
尋日美聯發咗個通告，話Albert因私人理由，提早辭任副主席及執行董事嘅職務，由今日起正式生效，足足早咗大半個月咁多。絲絲就估計，公司內部發生咗好多事，加上Albert早前飽受喪子之痛，相信佢呢排身心都好疲累，都係時候要抖一抖喇。所以大家短時間可能都冇咩機會見到佢，惟有上網重溫吓佢台上嘅耍太極片段。
不過，絲絲話晒都同Albert識咗咁耐，當然會有啲唔捨得佢咁快就「不辭而別」啦，所以就特登打電話問候佢。佢就話今次確係比起預期提早離開，純粹係私人理由，同時都係因為老婆心情差，所以都應該多啲時間陪老婆咁話。
Albert兩公婆，因為阿仔嘅離開好傷心，佢哋尋晚去咗睇Lady Gaga演唱會，都係想暫時拋開傷痛。Albert約咗絲絲今日茶敍，到時再詳細交代咁話喎。