絲絲講場:內地官媒猛轟 可口可樂傲慢

內地黑心食品猖獗就係人都知,原來啲國際品牌去到大陸,都好識得入鄉隨俗o架!就好似「股神」巴菲特嘅愛股可口可樂咁,雖然貴為世界五百強企業,但係一樣畀人發現喺內地出售嘅飲品度混入咗氯水。連官方媒體《人民日報》都發表文章,勁剷可口可樂「傲慢」、低估咗政府查處佢嘅決心同能力。

「含氯門」擾攘半個月

股神嘅旗艦巴郡,會喺呢個禮拜舉行股東會,唔知會唔會就住呢啲「傲慢」嘅批評,發表吓意見咁呢?

今次嘅「含氯門」擾攘咗成半個月,可口可樂由一開始死口唔認,到隨住內地媒體持續報道同監管部門駐廠調查,終於都要認衰,承認有部分產品含氯,不過間公司簡單嘅致歉,就被《人民日報》批評「讀唔到真誠,只係見到傲慢。」

轟洋品牌質量冇保證

《人民日報》仲話,有好多喺外國質量好好嘅洋品牌,一到內地就成日出現質量問題,要消除呢啲店大欺客、唯我獨尊的可口可樂式傲慢,需要政府喺加強監管、健全法規、完善市場等方面嘅長期努力。絲絲就諗到今日舉行嘅中美戰略與經濟對話,唔知食品安全問題會唔會都成為一個議題呢?

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!