近來壓力都幾大，成日收發電郵，已成為每日「公事」。Prof. J估今時今日，大家情況都差唔多，唔多唔少每個人都有部上網手機，又上網、又做公事，一機多用！正正因為呢個大趨勢，Prof. J亦不時睇住呢類型股票嘅波動，隨時可能掘到吓金。
TCL通訊（02618）主要從事移動手機和相關零組件嘅研發、生產同埋銷售業務。睇番近幾期公布嘅數據，集團往年銷售手機台數為3,600萬台，今個會計年度頭九個月已經銷售咗3,050萬台，照番速率，剩下三個月推算銷售量為3,800萬台左右。加上集團近年不斷對裝運過程採取不俗的營運成本控制，令盈利嘅預測準確性更為提高。隨住TCL不斷往高檔次用戶市場發展，只要銷售量達標，由於價量齊升嘅關係，盈利有望獲得大幅提高。
睇番集團近年對品牌Alcatel嘅收購計劃，使咗嗰4,000萬美元會分13.5年攤還，即每年還2.3億港元。Alcatel旗下產品上年貢獻盈利7億元，今年貢獻盈利頭三季都有7.6億元，加埋第四季係旺季，集團亦預期會獲得4,400萬台銷售。照盈利份額計，Alcatel今年如果能夠達標奪取11億元盈利，咁收購計劃今年攤分只佔盈利嘅0.2%，完全抵到爛！
集團往績亮麗，進入收成期，去年度盈利升2,951%，市盈率約6.5倍，大有可為。
香港大學電子金融服務榮譽助理教授徐燦傑