港交所（00388）上市科又有猛人將會離職，今次係專責會計事宜方面嘅上市科高級總監周雨年，佢唔係過檔其他機構，佢係因為退休，聽聞明年初就會同港交所講bye bye。
數數手指，港交所上市科近年都走咗唔少人，好似前上市推廣部總監李晞禔就被新加坡交易所「挖角」、上市科負責政策嘅總監Anne Chapman今年中亦已辭職，隨家人返回老家新西蘭。這仲未計舊年八月，被喻為上市科「明日之星」嘅陳翊庭離任。
講番周雨年，佢○五年十一月加盟港交所，主要職責係領導一組會計人員，向上市科提供規則執行、政策發展同處理交易等方面嘅支援。本身係會計師嘅佢，喺加入港交所前，係香港會計師公會監察部門嘅總監，負責香港會計及核數準則嘅監察及執行工作。
為咗填補周雨年嘅空缺，港交所已積極請人。絲絲聽聞，除咗請人填補職位空缺外，港交所未來亦會增加人手，梗係喇，港交所未來有咁多新發展計劃，自然要有充足兵力喇。
余詩韻