絲絲講場：彤叔十問十唔應
呢排全城關注周大福珠寶（01929）上市，尋日新世界發展（00017）開股東會，難得有機會見到主席鄭裕彤（彤叔），老記梗係一擁而上，成打問題咁掟出嚟，不過彤叔一貫咁瀟灑從容，一於少理，咩嘢都話無睇、無理，就連平日有講開嘅股市、樓市，佢都同絲絲話「你咪問我呢啲，我無理」，「你問鄭家純（彤叔仔仔）啦！」
周大福上市等純官交代
點知就連周大福珠寶上市，彤叔都話無理，之後仲拿拿臨走人，而新世界董事總經理鄭家純就話對周大福上市有信心，稍後會開記者會交代喎。
周大福上市係全城焦點，絲絲尋日睇報紙就爭啲嚇親，事關廣州市工商局做咗今年第三季嘅貴金屬玉石質量監測，當中有近三成不合格，而「周大福」竟然榜上有名？
知名品牌同陷「質量門」
絲絲捽吓眼睇清楚，原來係「周六福」至真，同謝瑞麟（00417）、金至尊、金六福、廣天藏品等多個品牌陷「質量門」，但一向標榜成色最足嘅周大福，就梗係無份啦。
話時話，內地相似嘅品牌真係好多，原來「福」字輩嘅金舖就有周六福、金六福、金大福，加埋仲有個周大生，連個招牌都好鬼似，好易令人混淆。
余詩韻