喺現時咁風高浪急嘅環境之下，船長真係少啲魄力都唔得！絲絲尋日見到有「魏船長」稱譽嘅中遠集團董事長魏家福，佢仲透露自己啱啱喺美國出席完APEC（亞太經合組織峰會）返嚟，深深感受到中國企業愈來愈走向國際化嘅路，仲希望外國企業放開懷抱接受咁話。
雖然面對住中遠洋系呢條船隊今年出現巨大虧損，同埋行業處於「寒冬」，佢依然拍晒心口話「No Worries」（不用擔心）。點解咁有信心？佢就好有自信咁話「因為我係船長」，他更相信喺中美兩大經濟火車頭唔太差嘅情況下，全球經濟就有救。
會議上，有人就問魏船長依家歐美經濟咁差，航運業日子係咪好難過，佢就話需求減慢同埋運力供過於求，航運業依家的確處於「寒冬」。不過，佢就話冬天到來，亦意味住春天即將來臨，更相信所需時間都唔會太長，喺呢個「冬眠」時候，最好就係將業務及資產重組，為未來嘅新機會作好準備。睇番魏總資料，其實都已經「行船」三十幾年，經歷過咁多年風風浪浪，絲絲都好期望佢帶領中遠洋系船隊好快可以再次「乘風破浪」！
余詩韻