昨日港股係「蠱惑的市」，外圍低收恒指卻平開，之後更一度抽升逾百點，嚇到沽過夜班淡友平倉過後，又再掉頭質低，尾市卻又倒升收場，CHOK到頭暈！
細價股有「燶」味，隻中國煤層氣（00578）同志高控股（00449）分別曾急挫87%及41%，尾市見有唔少散戶短炒博反彈，火中取栗要藝高人膽大，心口冇個「勇」字嘅，都係暫避股仔為妙。
部分游資轉戰大價股，昨日騰訊（00700）一洗頹風，收報158.8元，升3.3%；利豐（00494）亦彈逾3%，收報14.72元。穩穩陣陣，專門做三大電訊商生意的中通服（00552）亦有得諗，昨日10日及20日線剛抽穿50日線，MACD現雙牛利好訊號，小注一試博上4至4.1元，穿3.6元止蝕。
古晨