市場熱線：潤電可長揸短炒
港股卒之結束5連跌，本來尋日朝早起身見道指大跌，諗住恒指萬八點可能不保，之不過雖然美國個超級委員會變成嗌交委員會，但標普同穆迪兩間評級機構相當識做，話明唔會因此降低美國評級，美股期指亞洲時段已回升，亞洲魚缸朝早反應相當平靜，但港股上晝收市前因A股跌近1%而有一段驚嚇，恒指一度跌近萬八邊，到下晝3點幾至重拾升軌，埋單微升25點，成交罕見回升至582億元，但窩輪同牛熊證佔大市的成交超過四成，逼近歷史高位。
評級機構一向大細超，尤其穆迪最為忠心，即時轉移視線話法蘭西「3條煙」有牙煙。美國今次大步檻過，但共和黨擺明經濟愈差愈開心，到出年就可搶番個總統寶座，所以出年仍然唔多樂觀。不過，美國尋晚公布嘅第三季修訂GDP應該唔差（市場預期增長2.5%），第四季GDP仲預言會係今年最高，呢個感恩節仍可開心度過。
炒業績贏面唔算高
銀基（00886）成績表見光死，雖然可以賴冇派息，但業績股普遍係跌多升少，不過尋日仍見有人炒阿里巴巴（01688）同創維（00751）聽日公布嘅業績，比較之下，創維好似較博得過，舊年下半年度已明顯復甦，PE亦算低，只不過明年家電下鄉政策逐步結束唔知對佢影響有幾大。
雖然個市倒升，但有幾隻股仔散晒，煤層氣（00578）暴瀉超過8成嘅場面已好耐冇見過，皆因今時今日借孖展已經冇咁狼死，其實啲礦股能源股愈細粒愈唔敢掂，話明埋藏喺地下，冇人知係堅定流，唔通真係信由公司請番嚟嘅獨立分析報告？
做冷氣嘅志高（00449）跌幅亦一度達四成，收市縮窄到24%，舊年尾公司頻玩財技先供股又1送9紅股炒過上1蚊，今年阿爺補貼大減，上半年成績表要見紅，加埋全行存貨高企，隻股有排唔使睇。冬天買冷氣股即係扒逆水，買波司登（03998）、煤炭股或燃氣股先正路，舊年冬天係「千年一凍」，今年冬天又話特別凍，有大行已特別推薦北控（00392）。
通脹回落加價有望
有內地傳媒報道，阿爺已經批准咗實施民間階梯電價同階梯氣價，水電油氣價格改革講咗好耐，但前排通脹咁高乜都要拖住，依家順番啲又可舊事重提，其實電費同燃氣加價走唔甩，舊年年中天然氣加價25%，燃氣股要「硬食」差價年幾時間。至於電廠更加鬼殺咁嘈，煤價貴搞到唔少火電廠要見紅，最麻煩係要鬧電荒，所以有關加電費嘅消息愈傳愈勁。
據報電費每千瓦時加兩分人仔，電廠盈利就可回復一○年時水平。電力股炒加價已一段日子，就算有得加亦唔知加幾多，加得少隨時有反高潮。電力股本應係公用股，但喺祖國就變成國策股，不過華潤電力（00836）名副其實係電力股當中嘅藍籌股，收益率高過其他電力股成倍有多，本身亦不斷加大投資煤礦以抵銷成本上升影響，今年預測PE約13倍，成功加價將令明年盈利受惠，無論電費加幾多都可睇位買，長線投資抑或炒上落均有得諗。
古勝