絲絲講場：證監遭遮打業主迫遷？
證監會決定將「大本營」由中環遮打大廈，搬竇到長江中心，仲一簽就八年生死約，除咗證監會上下因為慳咗租金而飲得杯落外，獨立股評人David Webb尋日就撰文話，遮打大廈嘅鄰居應該仲開心，尤其係附近嘅高級珠寶店，佢哋終於可回復寧靜了。
續租要價貴過國金
Webb話，遮打大廈大業主置地向證監會提出續約嘅呎租高達180元，比國金呎租仲要高，其實係「轉個彎」想證監會搬出，事關遮打大廈入口，近年長期有人示威，又鑼又鼓，又高舉大量標語，更重要係由於示威人多，嘈到喺遮打大廈出入口，連講嘢都講不到。
Webb話，示威係要取得平衡，示威人士有權利抗議之餘，其他人亦應享有不受干擾，耳根清淨嘅權利，至於證監會將來搬去長江中心後，示威者會否轉移陣地，就要拭目以待。
心水清嘅Webb仲話，證監會喺遮打大廈之前，辦公室設喺置地廣場，兩所大廈業主都係置地，置地去咗新加坡上市，不受證監會監管。
余絲韻