證監會前行政總裁韋奕禮已走咗半個月有多，究竟邊個接任佢個位，政府最快都要七月至公布。絲絲從多方面渠道得悉，證監會新CEO預料會由澳洲人出任，市傳澳洲證監會委員Shane Tregillis及德意志銀行亞洲區首席律師梁智輝（Joseph Longo）係兩大熱門。
佢哋兩個都係澳洲人，Shane Tregillis依家喺澳洲證監會做委員，之前喺新加坡金管局做過，對監管各個範疇包括上市公司監管、市場行為有唔少經驗。
至於梁智輝，港人對佢並唔陌生，佢喺○六年五月起出任港交所（00388）上市委員會成員，去年才退任。佢曾出任澳洲證監會執行部總監，主力法規執行。
除咗呢兩位，其實仲有一位澳洲重量級人物，獲政府力邀出任證監會新CEO，佢就係證監會前執行董事Andrew Procter，據聞佢曾喺英國FSA做過法規執行部阿頭，之後去咗英國德意志銀行做歐洲Compliance（即係法規監察）主管，其後升任該行嘅全球Compliance主管，後來更「升呢」，主力負責該行與全球監管機構嘅關係。不過聽聞依家份工畀佢好大滿足感，所以佢已婉拒政府好意，無意回巢。
余絲韻