絲絲講場：台積電股價破80賀張忠謀大壽
兩年前嘅金融風暴，令原本打算退居二線嘅台灣科技業大哥張忠謀（圖）決定重回第一線，由愛徒蔡力行手中接番台積電總執行長嘅職位，下月十日就係張忠謀嘅八十大壽，喺佢生日前，台積電全體上下已送上一份大禮，唔單只係首季業績好理想，公司股價更曾經衝上80元新台幣，創下8年來嘅新高。
同老婆撐枱腳慶祝
張忠謀尋日出席股東會後，被問到今年嘅生日願望，佢話冇乜特別，只係想繼續做好自己鍾意做、可以做嘅工作。雖然太太都問過佢要唔要請啲親朋好友一齊祝壽及安排啲娛樂節目，但經過討論後，決定只係兩公婆搵間餐廳食飯，而且為咗遷就太太要去美國參加達賴喇嘛嘅法會，佢仲要提前慶祝生日，所以正日嗰日會係好「正常」嘅一天。
唔講唔知，原來張忠謀與太太張淑芬都係Apple迷，屋企有三部iPad及兩部iPhone，他話自己最鍾意用蘋果公司嘅產品，不過喺工作上，佢有時都會用吓黑莓機打電話及睇電郵。
余絲韻