新世界發展（00017）係本港主要嘅地產發展商之一，一向負責集團賣樓事務嘅新世界地產代理執行董事何伍燕榆同絲絲講，話佢會喺本月底後正式退休，佢又坦言自己喺畢業後嘅10年青春，係「貢獻」咗畀美孚新邨。
何太當年畢業後，就入咗美孚石油負責賣樓，經過約10年時間賣晒美孚新邨約11,000個單位，之後新世界買入美孚新邨商場等物業，何太就順勢加入新世界，不經不覺効力咗新世界已31年，縱橫地產界足足40多年。
雖然退休在即，何太尋日仍親自主持集團旗下大坑新盤命名儀式，仲即場吟詩講解樓盤名稱由來。
絲絲亦趁機會問吓何太多年來嘅難忘事，佢話美孚新邨係佢印象最深嘅樓盤，皆因成個盤由佢一手一腳負責，當年仲係全港首個賣樓花及設有示範單位嘅新盤，佢自己人生嘅第一層樓，亦係美孚新邨一個面積500幾方呎嘅一房戶，當年以二手價6萬元買入然後放租。
何太話退休後除咗去旅行以及幫手湊6個孫女之外，仲考慮學太極，所以退休生活都會好忙。另有小道消息話，信置（00083）前聯席董事楊文將會喺下周加盟新世界，接棒賣樓工作。
余絲韻