證監會行政總裁韋奕禮尋日Last day，除咗有立法會議員詹培忠及一班傳媒向佢送別外，一班雷曼苦主亦唔知喺邊度收到風，知道韋奕禮就快離開香港，把握最後機會，齊集喺佢辦公室樓下嘅遮打大廈門外，實行以示威抗議向佢道別「贈興」。
臨別在即嘅韋奕禮對於雷曼苦主臨走「送大禮」，以平常心看待，但佢回顧過去嘅工作時，就坦言○八年雷曼事件係佢6年任內嘅低潮，因為雷曼相關產品廣泛銷售，雷曼倒閉後又要處理大量投訴，對證監會嚟講，○八年九月至當年嘅聖誕節前，係證監會最困難嘅時期。不過佢話任內最開心嘅事，亦係能完成大量雷曼相關產品嘅賠償問題，為雷曼小投資者爭取到大部分賠償。依家大部分雷曼投資者已接受賠償，只有少部分人士仍繼續抗爭。講開雷曼事件，佢又證實當年雷曼剛「爆鑊」時佢唔喺香港，正喺外國參加國際證監會組織會議，但佢已盡快趕返香港。
睇番證監會尋日發表嘅年報，截至今年三月底止年度，韋奕禮人工總計達932.7萬元 ，較上年度嘅909萬元微升2.6%。韋奕禮尋晚已離開香港，先飛去馬來西亞神山充電，下周二返港執拾行李，然後直飛倫敦，完全體現香港人效率奇高嘅精神。
余絲韻